(Artikel)
Jaga
pengerai jantung, udah kena baru ka berubat
KUCHING: Sarawak Heart
Foundation (SHF) enggau Yayasan Jantung Malaysia (YJM) disukung Opis Menteri
Pengerai Malaysia di Bintulu deka ngatur kimpin Minggu Jantung belabuh ari
18-20 Mei, berengkah pukul 10.30 pagi nyentuk ke pukul 8.30 malam di Pasaraya
Parkcity.
Atur pengawa nya deka
dipejadi Menteri Muda Pengawa Dagang Temuai, Datuk Talib Zulpilip ti mega nyadi
Kaban Kunsil Nengeri (ADUN) Jepak, Bintulu.
Lembaga Pengarah SHF,
Prof Dr Sim Hui Kian madah kimpin baka tu sigi seruran diatur laban ngemeratka
pengerai mensia mayuh kelebih agi meri penemu bekaul enggau penyakit jantung
nyadi entara lima bansa penyakit ke ngujungka orang parai.
“Penyakit jantung ulih
nyadi ba kitai, enda ngira diau di mengeri tauka di menua pesisir. Nya alai
pengawa baka tu patut dikerembaika ukai semina di mengeri aja tang di menua
pesisir,” ku Sim.
Ba kimpin di Bintulu nya
ila, iya madah mensia mayuh ulih datai ngagai pengawa pemandang tu lalu meresa
pengerai jantung sida iya, kelimpah ari mayuh macham aktiviti bukai bekait
enggau pengerai jantung.
“SHF enggau YJN bekunsi
tuju, iya nya ngerembaika pemadah ngambika mensia mayuh betatika pengerai
jantung sida kelebih agi ba penyakit jantung (Cardiovascular diseases) di menua
tu ke majak nambah.
“Nitihka statistik, 29
persin pemarai mensia mayuh di serata dunya tu ketegal sakit jantung, iya nya
sebansa ari penyakit ke pengabis tinggi ngujungka orang parai,” ku iya.
Iya nambah, taja pen,
perengka guna kena ngubat penyakit njantung tu majak manah, tang penyakit
jantung agi nyadi kebuah pengabis besai orang parai.
“Penyakit jantung
sebansa penyakit datai ari chara pendiau lalu ukai ketegal igi penyakit ke
ngerampit.
“Ngerembaika penemu baka
tu ngagai orang mayuh manah ngambika sida nemu bakani ku raya penyakit tu lalu
mega ngajar nyaga pengerai jantung sida,” ku iya.
Dalam kandang tiga hari
kimpin nya, entara aktiviti ke deka diatur iya nya meresa peninggi darah, Body
Mass Index (BMI), meresa gula enggau tikas kolestrol nyengkaum pengawa
pemandang bekait enggau isu pengerai.
“Pengabis manah gaya ke
patut dititihka kitai, iya nya diau dalam pendiau ke bepengerai, baka makai
utai ke bepengerai, eksasais sereta anang nginsap.
“Nadai guna kitai
berubat enti sema udah kena sakit jantung, tauka udah beputung…Nyau kelalu laun
ngintu pengerai diri empu ,” ku iya.
SHF mega bisi mantu sida
ke miskin, ke enda ulih mayar bil kelebih agi enti sida iya bisi beputung.
“Pesakit ke kurang
penatai pemisi mayar pengawa beputung, deka dibantu SHF laban bisi bekerejsama
enggau Sepital Besai Sarawak (SGH).
“Bakani ku naka ke enda
ulih dibantu perintah, laluh nya deka disaup SHF,” ku iya.
Tandu Sim, enti
diperatika diatu, mayuh mensia udah belabuh betapi enggau penyakit jantung.
“Pengawa dagang lutur
pen manah, laban penyampau orang ke sakit jantung nyau nambah,” ku iya bejaku
tundi.
Iya madah, lelaki beumur
45 taun ke atas besai endar awak deka kena penyakit jantung tang orang indu,
udah abis ‘menopause’ (urung 55 taun ke atas).
“Tang enti diri sebilik
sigi udah bisi kena sakit jantung tauka kemi manis, tumu agi ‘nyau’. Nya alai
disiplin nya berat. Anang semina madahka diri empu nemu aja pasal pengerai
jantung, tang enda kala beperesa, semina bejaku aja,” ku iya.
Tiada ulasan:
Catat Ulasan